स्वास्थ्य

गर्मीमा नाकबाट रगत बग्ने समस्या बढी देखिए के गर्ने ?

काठमाडौं- विभिन्न खाले संक्रमण र अत्याधिक गर्मीले नाक सुक्खाहुँदा नाकबाट रगत बग्ने (नाथ्री फुट्ने) समस्या बढी देखिन थालेको छ ।

वीर अस्पतालका नाक, कान र घाँटी रोग विशेषज्ञ डा.लालकिशोर यादवले नाकबाट रगत बग्ने विभिन्न कारण भएपनि संक्रमण नै मुख्य कारण भएको बताए ।

उनले भने,‘नाक कोट्याउने बानी, चोटपटक, ठोक्किएर, पिनास, नाकको भित्रको मसिनो पर्दा (रक्तनली) फुटेर रगत बग्ने सम्भावना बढी हुन्छ ।’

त्यस्तै, रगत जमाउने तत्वमा कमी आउँदा, रगत पातलो बनाउने औषधिको सेवनका कारणले पनि रगत बग्ने गर्छ– डा.यादवले भने ।

ओम अस्पतालका नाक, कान, घाँटी विभागका प्रमुख डा.अनिल झाले पछिल्लो समय अत्यधिक धुलोका कारणले पनि नाकलाई सुक्खा बनाउँदा नाकको भित्री भागमा रगतको सम्पे्रषण हुने नली फुट्न सक्ने बताए ।

उनले कसैलाई रगत बगेर केही समयमा रोकिन सक्ने तर लामो समयसम्म रगत बगिरहेमा चिकित्सकसँग सल्लाह लिनुपर्ने, नत्र समस्या बढ्न सक्ने बताउँदै चिकित्सककहाँ जान समय लाग्ने भए र रगत बग्न रोकिएन भने घरमै नाकलाई थिचेर मुखबाट स्वास फेर्न तथा बरफ नाकमाथि राख्दा केही हदसम्म लाभ हुने बताए ।

चिकित्सकका अनुसार वृद्धवृद्धालाई विभिन्न खाले समस्या देखिने र बच्चापनि बढी नाक कोट्याउने, घाममा बढी खेल्ने भएकाले यी उमेरका व्यक्ति बढी प्रभावित हुने गर्छन् ।

धेरै रगत बग्दा रक्तचाप कम हुने, चक्कर लाग्ने, नाकमा अन्य समस्या देखापर्ने र अत्यधिक रगत बग्दा ज्यानलाई नै जोखिम हुने भएकाले समयमा उपचार गराउनुपर्छ ।

 

प्रतिकृया दिनुहोस